පරිවර්තනය https://suttacentral.net/sn3.21/si/zoysa
https://www.youtube.com/watch?v=GzuACdJi34M&feature=youtu.be
(ZOOM ඇප් එකෙන් සම්බන්ධ නොවී, යූටූබ් හරහා ඔන්ලයින් නැරඹීමට පමණක් අවශ්‍ය ඔබගේ යහලුවන්ට මේ ලින්ක් එක යැවිය හැකිය)
පුග්‌ගලසුත්‌තං
සාවත්‌ථිනිදානං . අථ ඛො රාජා පසෙනදි කොසලො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නං ඛො රාජානං පසෙනදිං කොසලං භගවා එතදවොච – ‘‘චත්‌තාරොමෙ, මහාරාජ, පුග්‌ගලා සන්‌තො සංවිජ්‌ජමානා ලොකස්‌මිං. කතමෙ චත්‌තාරො? තමොතමපරායනො, තමොජොතිපරායනො, ජොතිතමපරායනො, ජොතිජොතිපරායනො’’.
‘‘කථඤ්‌ච, මහාරාජ පුග්‌ගලො තමොතමපරායනො හොති? ඉධ, මහාරාජ, එකච්‌චො පුග්‌ගලො නීචෙ කුලෙ පච්‌චාජාතො හොති, චණ්‌ඩාලකුලෙ වා වෙනකුලෙ වා නෙසාදකුලෙ වා රථකාරකුලෙ වා පුක්‌කුසකුලෙ වා දලිද්‌දෙ අප්‌පන්‌නපානභොජනෙ කසිරවුත්‌තිකෙ,යත්‌ථ කසිරෙන ඝාසච්‌ඡාදො ලබ්‌භති. සො ච හොති දුබ්‌බණ්‌ණො දුද්‌දසිකො ඔකොටිමකො බව්‌හාබාධො කාණො වා කුණී වා ඛඤ්‌ජො වා පක්‌ඛහතො වා, න ලාභී අන්‌නස්‌ස පානස්‌ස වත්‌ථස්‌ස යානස්‌ස මාලාගන්‌ධවිලෙපනස්‌ස සෙය්‍යාවසථපදීපෙය්‍යස්‌ස. සො කායෙන දුච්‌චරිතං චරති, වාචාය දුච්‌චරිතං චරති, මනසා දුච්‌චරිතං චරති. සො කායෙන දුච්‌චරිතං චරිත්‌වා වාචාය දුච්‌චරිතං චරිත්‌වා මනසා දුච්‌චරිතං චරිත්‌වා, කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජති.
‘‘සෙය්‍යථාපි, මහාරාජ , පුරිසො අන්‌ධකාරා වා අන්‌ධකාරං ගච්‌ඡෙය්‍ය, තමා වා තමං ගච්‌ඡෙය්‍ය, ලොහිතමලා වා ලොහිතමලං ගච්‌ඡෙය්‍ය. තථූපමාහං, මහාරාජ, ඉමං පුග්‌ගලං වදාමි. එවං ඛො, මහාරාජ, පුග්‌ගලො තමොතමපරායනො හොති.
‘‘කථඤ්‌ච, මහාරාජ, පුග්‌ගලො තමොජොතිපරායනො හොති? ඉධ, මහාරාජ, එකච්‌චො පුග්‌ගලො නීචෙ කුලෙ පච්‌චාජාතො හොති, චණ්‌ඩාලකුලෙ වා වෙනකුලෙ වා නෙසාදකුලෙ වා රථකාරකුලෙ වා පුක්‌කුසකුලෙ වා දලිද්‌දෙ අප්‌පන්‌නපානභොජනෙ කසිරවුත්‌තිකෙ, යත්‌ථ කසිරෙන ඝාසච්‌ඡාදො ලබ්‌භති. සො ච ඛො හොති දුබ්‌බණ්‌ණො දුද්‌දසිකො ඔකොටිමකො බව්‌හාබාධො, කාණො වා කුණී වා ඛඤ්‌ජො වා පක්‌ඛහතො වා, න ලාභී අන්‌නස්‌ස පානස්‌ස වත්‌ථස්‌ස යානස්‌ස මාලාගන්‌ධවිලෙපනස්‌ස සෙය්‍යාවසථපදීපෙය්‍යස්‌ස. සො කායෙන සුචරිතං චරති, වාචාය සුචරිතං චරති, මනසා සුචරිතං චරති. සො කායෙන සුචරිතං චරිත්‌වා වාචාය සුචරිතං චරිත්‌වා මනසා සුචරිතං චරිත්‌වා, කායස්‌ස භෙදා පරං මරණා සුගතිං සග්‌ගං ලොකං උපපජ්‌ජති.
‘‘සෙය්‍යථාපි, මහාරාජ, පුරිසො පථවියා වා පල්‌ලඞ්‌කං ආරොහෙය්‍ය, පල්‌ලඞ්‌කා වා අස්‌සපිට්‌ඨිං ආරොහෙය්‍ය, අස්‌සපිට්‌ඨියා වා හත්‌ථික්‌ඛන්‌ධං ආරොහෙය්‍ය, හත්‌ථික්‌ඛන්‌ධා වා පාසාදං ආරොහෙය්‍ය. තථූපමාහං, මහාරාජ, ඉමං පුග්‌ගලං වදාමි. එවං ඛො, මහාරාජ, පුග්‌ගලො තමොජොතිපරායනො හොති.
‘‘කථඤ්‌ච, මහාරාජ, පුග්‌ගලො ජොතිතමපරායනො හොති? ඉධ , මහාරාජ, එකච්‌චො පුග්‌ගලො උච්‌චෙ කුලෙ පච්‌චාජාතො හොති, ඛත්‌තියමහාසාලකුලෙ වා බ්‍රාහ්‌මණමහාසාලකුලෙ වා ගහපතිමහාසාලකුලෙ වා, අඩ්‌ඪෙ මහද්‌ධනෙ මහාභොගෙ පහූතජාතරූපරජතෙ පහූතවිත්‌තූපකරණෙ පහූතධනධඤ්‌ඤෙ. සො ච හොති අභිරූපො දස්‌සනීයො පාසාදිකො, පරමාය වණ්‌ණපොක්‌ඛරතාය සමන්‌නාගතො, ලාභී අන්‌නස්‌ස පානස්‌ස වත්‌ථස්‌ස යානස්‌ස මාලාගන්‌ධවිලෙපනස්‌ස සෙය්‍යාවසථපදීපෙය්‍යස්‌ස. සො කායෙන දුච්‌චරිතං චරති, වාචාය දුච්‌චරිතං චරති, මනසා දුච්‌චරිතං චරති. සො කායෙන දුච්‌චරිතං චරිත්‌වා වාචාය දුච්‌චරිතං චරිත්‌වා මනසා දුච්‌චරිතං චරිත්‌වා, කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජති.
‘‘සෙය්‍යථාපි, මහාරාජ, පුරිසො පාසාදා වා හත්‌ථික්‌ඛන්‌ධං ඔරොහෙය්‍ය, හත්‌ථික්‌ඛන්‌ධා වා අස්‌සපිට්‌ඨිං ඔරොහෙය්‍ය, අස්‌සපිට්‌ඨියා වා පල්‌ලඞ්‌කං ඔරොහෙය්‍ය, පල්‌ලඞ්‌කා වා පථවිං ඔරොහෙය්‍ය, පථවියා වා අන්‌ධකාරං පවිසෙය්‍ය. තථූපමාහං, මහාරාජ, ඉමං පුග්‌ගලං වදාමි. එවං ඛො, මහාරාජ, පුග්‌ගලො ජොතිතමපරායනො හොති.
‘‘කථඤ්‌ච, මහාරාජ, පුග්‌ගලො ජොතිජොතිපරායනො හොති? ඉධ, මහාරාජ, එකච්‌චො පුග්‌ගලො උච්‌චෙ කුලෙ පච්‌චාජාතො හොති, ඛත්‌තියමහාසාලකුලෙ වා බ්‍රාහ්‌මණමහාසාලකුලෙ වා ගහපතිමහාසාලකුලෙ වා, අඩ්‌ඪෙ මහද්‌ධනෙ මහාභොගෙ පහූතජාතරූපරජතෙ පහූතවිත්‌තූපකරණෙ පහූතධනධඤ්‌ඤෙ. සො ච හොති අභිරූපො දස්‌සනීයො පාසාදිකො, පරමාය වණ්‌ණපොක්‌ඛරතාය සමන්‌නාගතො , ලාභී අන්‌නස්‌ස පානස්‌ස වත්‌ථස්‌ස යානස්‌ස මාලාගන්‌ධවිලෙපනස්‌ස සෙය්‍යාවසථපදීපෙය්‍යස්‌ස. සො කායෙන සුචරිතං චරති, වාචාය සුචරිතං චරති, මනසා සුචරිතං චරති. සො කායෙන සුචරිතං චරිත්‌වා වාචාය සුචරිතං චරිත්‌වා මනසා සුචරිතං චරිත්‌වා, කායස්‌ස භෙදා පරං මරණා සුගතිං සග්‌ගං ලොකං උපපජ්‌ජති.
‘‘සෙය්‍යථාපි, මහාරාජ, පුරිසො පල්‌ලඞ්‌කා වා පල්‌ලඞ්‌කං සඞ්‌කමෙය්‍ය, අස්‌සපිට්‌ඨියා වා අස්‌සපිට්‌ඨිං සඞ්‌කමෙය්‍ය, හත්‌ථික්‌ඛන්‌ධා වා හත්‌ථික්‌ඛන්‌ධං සඞ්‌කමෙය්‍ය, පාසාදා වා පාසාදං සඞ්‌කමෙය්‍ය. තථූපමාහං, මහාරාජ, ඉමං පුග්‌ගලං වදාමි. එවං ඛො, මහාරාජ, පුග්‌ගලො ජොතිජොතිපරායනො හොති. ඉමෙ ඛො, මහාරාජ, චත්‌තාරො පුග්‌ගලා සන්‌තො සංවිජ්‌ජමානා ලොකස්‌මි’’න්‌ති. ඉදමවොච…පෙ.…
‘‘දලිද්‌දො පුරිසො රාජ, අස්‌සද්‌ධො හොති මච්‌ඡරී;
කදරියො පාපසඞ්‌කප්‌පො, මිච්‌ඡාදිට්‌ඨි අනාදරො.
‘‘සමණෙ බ්‍රාහ්‌මණෙ වාපි, අඤ්‌ඤෙ වාපි වනිබ්‌බකෙ;
අක්‌කොසති පරිභාසති, නත්‌ථිකො හොති රොසකො.
‘‘දදමානං නිවාරෙති, යාචමානාන භොජනං;
තාදිසො පුරිසො රාජ, මීයමානො ජනාධිප;
උපෙති නිරයං ඝොරං, තමොතමපරායනො.
‘‘දලිද්‌දො පුරිසො රාජ, සද්‌ධො හොති අමච්‌ඡරී;
‘‘සමණෙ බ්‍රාහ්‌මණෙ වාපි, අඤ්‌ඤෙ වාපි වනිබ්‌බකෙ;
උට්‌ඨාය අභිවාදෙති, සමචරියාය සික්‌ඛති.
තාදිසො පුරිසො රාජ, මීයමානො ජනාධිප;
උපෙති තිදිවං ඨානං, තමොජොතිපරායනො.
කදරියො පාපසඞ්‌කප්‌පො, මිච්‌ඡාදිට්‌ඨි අනාදරො.
‘‘සමණෙ බ්‍රාහ්‌මණෙ වාපි, අඤ්‌ඤෙ වාපි වනිබ්‌බකෙ;
අක්‌කොසති පරිභාසති, නත්‌ථිකො හොති රොසකො.
‘‘දදමානං නිවාරෙති, යාචමානාන භොජනං;
තාදිසො පුරිසො රාජ, මීයමානො ජනාධිප;
උපෙති නිරයං ඝොරං, ජොතිතමපරායනො.
‘‘අඩ්‌ඪො චෙ පුරිසො රාජ, සද්‌ධො හොති අමච්‌ඡරී;
දදාති සෙට්‌ඨසඞ්‌කප්‌පො, අබ්‍යග්‌ගමනසො නරො.
‘‘සමණෙ බ්‍රාහ්‌මණෙ වාපි, අඤ්‌ඤෙ වාපි වනිබ්‌බකෙ;
උට්‌ඨාය අභිවාදෙති, සමචරියාය සික්‌ඛති.
‘‘දදමානං න වාරෙති, යාචමානාන භොජනං;
තාදිසො පුරිසො රාජ, මීයමානො ජනාධිප;
උපෙති තිදිවං ඨානං, ජොතිජොතිපරායනො’’ති.
Comments
Post a Comment